Euskeran Itotiyak

Hasiera batean, gazteak euskara edozein arlo eta eremutan erabili daitekeela ohartu zitezen hainbat euskarazko hitz eta esaldi zabaldu genituen herrian zehar; bai parranda girokoak, haserretzean esateko, ligatzean esateko. Oiartzungo jaietan ere, Xanistebanetan, hainbat ekintza burutzen ditugu. Batetik, Kataxulo gaztetxiarekin batera “pegatinen jokua” egiten dugu. Hemen, euskarazko esaldi, esaera zahar, piropo… ezberdinak hartzen ditugu eta esaldia bitan zatitzen dugu, bi pegatinetan idatziz. Ondoren, gazteei jartzen dizkiegu eta beraiek euren bikotea aurkitu behar dute. Bestalde, euskal karaokea egiten dugu. Hiru urtez jarraian egin dugu, arrakasta handiarekin. Honekin argi geratzen da, nahiz tabernetan abesti erdaldunak jarri, euskarazko kantekin ere parranda egin daitekeela. Honez gain, jaietako egun guztietan zehar piropo lehiaketa egiten dugu. Aurten IV.piropo lehiaketa egingo dugu. Urtetik urtera arrakasta handia izaten ari da. Lehiaketa egin ondoren piropo irabazlearekin kamixetak ateratzen ditugu, baita lehiaketan atera diren piropo guztien liburuxka osatu ere. Hemen ere, argi geratzen da ligatzeko ez dugula zertan erdarara jo behar, gu euskararekin ongi moldatzen garela edozein arlotan, baita ligatzeko ere. Azkenik urte osoko lanaren ondorioz, 2008.urte bukaeran gure azken proiektua kaleratu genuen. Oiartzungo musika taldeek osatutako euskara hutsezko CD-a. Lehen esan bezala, gure nahia gazte esparruak euskalduntzea da. Oiartzungo musika esparruan erdarak zuen presentzia ikusirik, jarri genuen martxan euskara hutsezko CD-aren proiektu hau. Oiartzunen musika talde eta bakarlari asko zegoela sumatu genuen, baina kantatzeko duten hizkuntza ohiturari erreparatuz konturatu ginen erderarako joera ikaragarria zela. Proiektu honekin herriko musikariak beraien lanak euskaraz konposatzera animatu nahi genituen, eta bide batez, baita beraien abesti bat grabatua edukitzeko aukera eskaini ere. Nahiz eta hasierako helburua beraz, erdaraz kantatzeko ohitura duten taldeak euskaraz egitera animatzea zen, esan behar dugu, proiektua martxan zihoan ahala, berez euskaraz egiten duten bakarlari zein taldeak ere parte hartu dutela CD honetan. Horrela, herriko taldeen euskara hutsezko musika cd hau osatzea lortu dugularik. ITOTI BAT GUTXIYO musika Cd hain zuzen. Modu honetara, Oiartzungo musikariak euskaraz egitea lortu dugu, musika esparruko itotiya ez erortzea lortu dugu. Beraz, ITOTI BAT GUTXIYO BILTZEKO! Jende askoren dedikazio, lan eta borondatearekin lortu dugu gure helburua betetzea: herritarrak herritarrentzat egindako EUSKERA HUTSEZKO musika CD-a!! Helburu hau lortu badugu ere, aurrerantzean, orain arte bezala lanean jarraituko dugu, beste helmuga batzuk finkatuz eta haien alde lan eginez (HIKA-ren lanketa, gazte hizkera…), beti ere euskararentzat eta euskaraz. Urratsez urrats lortuko dugu euskara galtzen ari den itoti hoik denak biltzea! Gazte, heldu itotiyai!